Ivan's Childhood (1962)

ဒီရုပ်ရှင်ဟာ စစ်ပွဲရုပ်ရှင်တွေထဲမှာ အလှပဆုံးနဲ့ အဆွေးမြေ့ဆုံး ကဗျာတစ်ပုဒ်လို့ တင်စားရပါလိမ့်မယ်။ ရုရှားဒါရိုက်တာ Andrei Tarkovsky ရဲ့ လက်ရာဖြစ်တဲ့ "Ivan's Childhood" ဟာ ကြည့်ရှုသူရဲ့ နှလုံးသားကို ဆွဲကိုင်လှုပ်ခါနိုင်တဲ့ အနုပညာလက်ရာတစ်ခုပါ။ ဇာတ်လမ်းကတော့ ဒုတိယကမ္ဘာစစ်အတွင်းမှာ မိဘနှစ်ပါးစလုံးကို နာဇီတွေလက်ချက်နဲ့ ဆုံးရှုံးလိုက်ရတဲ့ ၁၂ နှစ်သား ကောင်လေး "အိုင်ဗန်" (Ivan) အကြောင်းပါ။ သာမန်ကလေးတစ်ယောက်အနေနဲ့ ကစားခုန်စား ပျော်ပါးနေရမယ့်အရွယ်မှာ အိုင်ဗန်ဟာ ဆိုဗီယက်တပ်မတော်ရဲ့ ထောက်လှမ်းရေးကင်းထောက်တစ်ယောက် ဖြစ်နေပါပြီ။ သူ့ရဲ့ ခန္ဓာကိုယ်သေးသေးလေးကို အသုံးချပြီး ရန်သူ့နယ်မြေထဲ ဝင်ရောက်ကာ သတင်းယူရတဲ့ အန္တရာယ်ကြားက အလုပ်ကို သူလုပ်ပါတယ်။ ဒါပေမဲ့ ဒီရုပ်ရှင်က စစ်ပွဲတိုက်ခိုက်ခန်းတွေကို ပြတာမဟုတ်ပါဘူး။ စစ်ပွဲက ကလေးတစ်ယောက်ရဲ့ စိတ်ဝိညာဉ်ကို ဘယ်လိုရိုက်ချိုးဖျက်ဆီးလိုက်သလဲဆိုတာကို ပြသထားတာပါ။အိုင်ဗန်ရဲ့ မျက်လုံးတွေမှာ ကလေးတစ်ယောက်ရဲ့ အပြစ်ကင်းစင်မှုမရှိတော့ဘဲ လက်စားချေလိုစိတ်နဲ့ အမုန်းတရားတွေသာ ပြည့်နှက်နေတာကို မြင်ရတာ အရမ်းကို ရင်နင့်စရာကောင်းပါတယ်။ "ငါ့မှာ ကလေးဘဝဆိုတာ မရှိတော့ဘူး" လို့ သူပြောတဲ့စကားက ပရိသတ်ရဲ့ ရင်ကို ဓားနဲ့မွှန်းသလို ခံစားရစေပါလိမ့်မယ်။ရုပ်ရှင်ရဲ့ အထူးခြားဆုံးအချက်ကတော့ အိုင်ဗန်ရဲ့ အိပ်မက်တွေပါပဲ။ လက်တွေ့ဘဝမှာ ရွှံ့နွံတွေ၊ အမှောင်ထုတွေ၊ သေနတ်သံတွေနဲ့ ပြည့်နေပေမဲ့ သူ့အိပ်မက်ထဲမှာတော့ လင်းလက်နေတဲ့ နေရောင်ခြည်၊ ပန်းသီးတွေ၊ သူ့အမေရဲ့ ပြုံးရယ်သံတွေနဲ့ အရမ်းကို လှပနေပါတယ်။ ဒီအလှတရားနဲ့ လက်တွေ့ဘဝရဲ့ ရက်စက်မှုတို့ကို ယှဉ်ပြထားတာက ပိုပြီး လွမ်းဆွတ်စရာကောင်းစေပါတယ်။ အဖြူအမည်း ရုပ်ရှင်ဖြစ်ပေမဲ့ ရိုက်ကူးထားတဲ့ ရှုခင်းတွေက ပန်းချီကားတစ်ချပ်လို လှပလွန်းပါတယ်။ မီးလောင်ထားတဲ့ သစ်ပင်တွေ၊ ရ…